ܕܚܬܢ̈ܐ ܘܟܠ̈ܠܬܐ

ܐܶܓܰܪܬܳܐ ܕܦܰܘܠܳܘܣ ܫܠܺܝܚܳܐ ܕܰܠܘܳܬ ܐܶܦܶܣܳܝ̈ܶܐ
ܗ: ܟܒ ـ ܠܓ Ephesians 5:22-33

ܢܶܫ̈ܶܐ! ܡܰܛܺܝܥܽܘ ܠܰܐ ܓܰܘܪ̈ܰܬ̥ܟ̥ܽܘ ܟ̥ܶܕ ܠܡܳܪܰܢ. ܡܺܝܕ̥ܶܐ ܕܽܐܘ ܓܰܘܪܳܐ، ܐܽܘ ܪܺܝܫܳܐ ܕܺܐܝ ܐܰܢ̱ܬ̥ܬܳܝܳܐ. ܟ̥ܶܕ ܕܟܶܬܝܳܐ ܡܫܺܝ̣ܚܳܐ ܣܬܶܐ ܐܽܘ ܪܺܝܫܳܐ ܕܺܐܝ ܥܺܕܬܳܐ. ܘܗܺܝܝܶܐܝܳܐ ܐܽܘ ܡܰܟ̥ܠܨܳܢܳܐ ܕܽܐܘ ܔܰܣܰܕ. ܐܶܠܳܐ ܟ̥ܶܕ ܐܰܝܕܰܪܒܳܐ ܕܺܐܝ ܥܺܕܬܳܐ ܓܡܰܛܺܝܥܳܐ ܠܶܡܫܺܝ̣ܚܳܐ، ܗܰܘܟ̥ܰܐ ܣܬܶܐ ܓܠܳܙܶܡ ܕܰܢܢܶܫ̈ܶܐ ܕܡܰܛܺܝܥܺܝ ܠܰܓܰܘܪ̈ܰܬ̥ܬ̥ܶܗ ܒܟܽܠ ܡܶـܕܶܐ. ܓܰܘܪ̈ܶܐ! ܟ̥ܶܕ ܐܰܝܕܰܪܒܳܐ ܕܶܡܫܝ̣ܚܳܐ ܪܚܶܡ ܠܶܗ ܠܐܺܝ ܥܺܕܬܰܝܕܶܗ، ܗܰܘܟ̥ܰܐ ܗܰܬܽܘ ܣܬܶܐ ܪܚܰܡܽܘ ܐܰ ܢܶܫ̈ܰܬ̥ܟ̥ܽܘ. ܘܺܐܝ ܢܰܦܫܰܝܕ̥ܶܗ ܡܰܣܠܰܡܠܶܗ ܥܰܠ ܦܳـ̈ܬ̥ܳܬ̥ܰܗ̇. ܠܰܫܰܢ ܕܶܡܩܰܕܰܫ ܠܰܗ̇ ܘܡܰܢܕ̥ܰܦ ܠܰܗ̇ ܒܽܐܘ ܣܚܳܝܳܐ ܕܰܡܝ̈ܶܐ ܘܒܺܐܝ ܡܶܠܬܳܐ. ܘܡܰܩܶܡ ܠܰܗ̇ ܥܺܕܬܳܐ ܡܫܰܒܰܚܬܳܐ ܕܠܰܝܬ ܐܶܒܰܗ̇ ܠܳܐ ܥܰܝܒܳܐ ܘܠܳܐ ܢܶܩܨܰܐܢܺܝܶܐ، ܘܠܳܐ ܡܶܕܶܐ ܕܠܰܗ̱ܢܺܝ ܓܫܳܒܶܗ. ܐܶܠܳܐ ܕܗܽܘܝܳܐ ܩܰܕܺܝܫܬܳܐ ܘܕܠܳܐ ܩܶܐܣܽܘܪ. ܗܰܘܟ̥ܰܐ ܣܬܶܐ ܓܠܳܙܶܡ ܕܰܐܓܰܘܪ̈ܶܐ ܕܪܳܚܡܺܝ ܐܰ ܢܶܫ̈ܰܬ̥ܬ̥ܶܗ، ܟ̥ܕܰܐ ܔܰܣܰܐܕ̈ܶܐ ܕܪܽܘܚܰܝܝܶܗ. ܡܰܢ ܕܠܺܐܝ ܐܰܢ̱ܬ̥ܬܰܝܕܶܗ ܪܳܚܶܡ، ܪܽܘܚܶܗ ܓܪܳܚܶܡ. ܐ̱ܢܳܫܳܐ ܐܰܒܰܕܰܢ ܠܳܐ ܟܳܡܥܰܢܶܬ ܡܽܐܘ ܔܰܣܰܕ ܕܪܽܘܚܶܗ. ܐܶܠܳܐ ܟܳܗ̱ܘܶܐ ܠܶܗ ܡܳܪܳܐ ܘܟܳܡܰܘܟܶܠܶܐ، ܟ̥ܶܕ ܐܰܝܕܰܪܒܳܐ ܡܫܺܝܚܳܐ ܕܟܳܗ̱ܘܶܐ ܡܳܪܳܐ ܠܺܝ ܥܺܕܬܰܝܕܶܗ. ܡܽܐܘ ܣܰܒܰܒ ܕܰܐܚܢܰܐ، ܗܰܕ̈ܳܡܶܐܢܰـܐ ܡܽܐܘ ܦܰܓ̥ܪܰܝܕ̥ܶܗ (ܔܰܣܰܕܰܝܕ̥ܶܗ)، ܘܡܽܐܘ ܒܰܣܪܰܝܕ̥ܶܗ، ܘܡܰܐ ܓܰܪ̈ܡܰܝܕ̥ܶܗܢܰـܐ. ܡܽܐܘ ܣܰܒܰܒܰܐܢܳـܐ ܓܛܳܪܶܐ ܐܽܘ ܓܰܘܪܳܐ ܠܐܽܘ ܒܰܐܒܳܐ ܘܠܺܐܝ ܐܶܡܰܝܕ̥ܶܗ، ܘܓܡܳܛܶܐ ܠܺܐܝ ܐܰܢ̱ܬ̥ܬܰܝܕ̥ܶܗ. ܘܟܳܗ̱ܘܶܢ ܐܰ ܬܪܶܐ ܚܰܕ̱ ܔܰܣܰܕ. ܐܽܘ ܐ̱ܪܳܙܰܐܢܳـܐ (ܣܶܪ) ܪܰܒܳܐܝܳܐ. ܐܳܢܳܐ ܟܳܐܡܰܪ ܐ̱ܢܳܐ ܥܰܠ ܡܫܺܝ̣ܚܳܐ ܘܥܰܠܺܝ ܥܺܕܬܰܝܕܶܗ. ܐܶܠܳܐ ܗܰܬܽܘ، ܟܽܠ ܚܰܕ̱ ܚܰܕ̱ ܡܶܢܟ̥ܽܘ، ܛܪܳܐ ܗܰܘܟ̥ܰܐ ܪܳܚܶܡ ܐܺܝ ܐܰܢ̱ܬ̥ܬܰܝܕܶܗ ܟ̥ܶܐ ܪܽܘܚܶܗ. ܘܺܐܝ ܐܰܢ̱ܬ̥ܬܳܐ، ܛܪܳܐ ܡܶܚܬܰܪܡܳܐ ܐܽܘ ܓܰܘܪܰܝܕܰܗ̇. ܒܰܪܶܟ̥ܡܳܪܝ܀

ܕܰܐܪ̈ܡܠܶܐ ܘܕܰܐܪ̈ܡܠܳܬ݂ܳܐ

ܐܶܓܰܪܬܳܐ ܕܦܰܘܠܳܘܣ ܫܠܺܝܚܳܐ ܕܰܠܘܳܬ ܩܳܘܪ̈ܺܝܢܬܳܝܶܐ ܐ
ܙ: ܐ ـ ܝܐ 1Corinthians 7:1-11

ܥܰܠܽܘ ܡܶܕܶܐ ܕܶܟܬ̥ܽܘܟ̥ܽܘ ܐܶܠܺܝ: ܫܰܦܺܝܪܳܝܳܐ ܕܽܐܘ ܓܰܘܪܳܐ ܕܠܳܐ ܡܩܰܕܶܡ ܠܺܐܝ ܐܰܢ̱ܬ̥ܬܳܐ. ܐܶܠܳܐ ܡܽܐܘ ܣܰܒܰܒ ܕܺܐܝ ܙܳܢܝܽܘܬ̥ܳܐ، ܛܪܳܐ ܐܽܘ ܓܰܘܪܳܐ ܥܳܝܶܫ ܥܰܡܺܝ ܐܰܢ̱ܬ̥ܬܳܐ، ܘܺܐܝ ܐܰܢ̱ܬ̥ܬܳܐ ܛܪܳܐ ܥܰܝܫܳܐ ܥܰܡܽܘ ܓܰܘܪܳܐ. ܐܽܘ ܓܰܘܪܳܐ ܛܪܳܐ ܠܺܐܝ ܐܰܢ̱ܬ̥ܬܳܐ ܒܚܽܘܒܳܐ ܐܽܘ ܚܰܩܰܝܕ̥ܰܗ̇ ܕܳܐܒܶܐ. ܘܗܰܘܟ̥ܰܐ ܣܬܶܐ ܐܺܝ ܐܰܢ̱ܬ̥ܬܳܐ ܠܽܐܘ ܓܰܘܪܰܝܕܰܗ̇. ܐܺܝ ܐܰܢ̱ܬ̥ܬܳܐ ܠܰܬܝܳܐ ܐܰܡܶܪ ܥܰܠܽܘ ܔܰܣܰܕܰܝܕ̥ܰܗ̇، ܐܶܠܳܐ ܐܽܘ ܓܰܘܪܰܝܕ̥ܰܗ̇. ܗܰܘܟ̥ܰܐ ܣܬܶܐ ܐܽܘ ܓܰܘܪܳܐ ܠܰܬܝܳܐ ܐܰܡܶܪ ܥܰܠܽܘ ܔܰܣܰܕܰܝܕ̥ܶܗ ܐܶܠܳܐ ܐܺܝ ܐܰܢ̱ܬ̥ܬܰܝܕ̥ܶܗ. ܓ̥ܰܝܪ ܡܽܐܘ ܘܰܟ̥ܬ ܕܳܐܒܽܘܬܽܘ ܪܽܘܚܰܝܟ̥ܽܘ ܠܽܐܘ ܨܰܘܡܳܐ ܘܠܺܐܝ ܨܠܽܘܬ̥ܳܐ، ܡܶܚܕ̥ܳܕ̥ܶܐ ܠܳܐ ܡܶܦܪܳܫܽܘܬܽܘ. ܘܒܶܬ̥ܬ̥ܶܪ ܠܰܫܰܢ ܕܽܐܘ ܫܺܐܕ̥ܳܐ ܠܳܐ ܕܳܪܰܠܟ̥ܽܘ، ܢܰܩܩܰܐ ܐ̱ܚܪܶܬܳܐ ܠܺܝ ܘܰܕ̥ܥܺܐܝܰܬ̥ܟ̥ܽܘ ܕܥܰܪܽܘ. ܗܰܬ̥ܶܐ ܟܳܐܡܰܪ ܐܢܳܐ ܠܰܗ̱̇ ܟ̥ܶܕ ܠܰܕ̥ܰܥܺܝ̈ܦ، ܠܳܐ ܟ̥ܶܐ ܐܰܡܪܳܐ. ܐܳܢܳܐ ܟܳܐܒܰܥ ܐ̱ܢܳܐ ܕܰܐܢܢܳܫ̈ܶܐ ܟܽܠܠܶܗ ܟ̥ܳܐܬ̥ܺܝ ܕܗܳܘܶܢ. ܘܒܢܰܕ̥ܰܐܦܰܐ ܕܥܰܝܫܺܝ̣. ܐܶܠܳܐ ܟܽܠ ܚܰܕ̱ ܡܰܘܗܰܒܬ̥ܳܐ ܗܺܝܘ ܐܶܠܶܗ ܡܰܐܠܳܗܳܐ. ܟܺܝܬ ܗܰܘܟ̥ܰܐ ܘܟܺܝܬ ܗܰܘܟ̥ܰܐ. ܟܳܐܡܰܪ ܐܢܳܐ ܗܰܬ̥ܶܐ، ܠܰܗ̱ܢܺܝ ܕܠܰܬܬܶܐ ܢܶܫ̈ܶܐ ܘܠܰܐ ܐܰܪ̈ܡܠܳܬܳܐ: ܐܺܝܕ̥ܰܐ ܕܦܰܝܫܺܝ ܟ̥ܳܐܬ̥ܺܝ ܛܰܘܝܳܐ ܐܰܠܠܶܗ. ܐܶܠܳܐ ܐܺܝܕ̥ܰܐ ܠܳܐ ܟܳܩܽܘܕܪܺܝ ܕܶܡܣܰܝܒܪܺܝ، ܛܪܳܐ ܡܺܝܙܰܘܓ̥ܺܝ، ܡܺܝܕ̥ܶܐ ܡܶܚܠܰܦ ܕܚܰܕ̱ ܝܳܩܶܕ ܒܺܐܝ ܪܰܝܰܐܓܰܐ، ܛܰܘܝܳܐ ܕܡܺܝܙܰܘܶܓ̥. ܘܠܰܐܝܢܰܐ ܕܟܶܬܢܶـܐ ܓܰܘܺܝܪ̈ܶܐ، ܠܳܐ ܐܳܢܳܐ، ܐܶܠܳܐ ܐܽܘ ܡܳܪܰܝܕ̥ܺܝ ܗܰܘܟ̥ܰܐ ܓܡܳܨܶܐ. ܛܪܳܐ ܐܺܝ ܐܰܢ̱ܬ̥ܬܳܐ ܠܳܐ ܡܶܦܪܳܫܳܐ ܡܽܐܘ ܓܰܘܪܰܝܕܰܗ̇. ܘܺܐܝܕ̥ܰܐ ܕܡܶܦܪܳܫܳܐ، ܛܪܳܐ ܦܰܝܫܳܐ ܕܠܳܐ ܓܰܘܪܳܐ. ܘܝܰܐ ܣܬܶܐ ܡܺܝܫܰܝܢܳܐ ܥܰܡܽܘ ܓܰܘܪܰܝܕ̥ܰܗ̇. ܘܽܐܘ ܓܰܘܪܳܐ ܛܪܳܐ ܠܳܐ ܡܰܪܦܶܐ ܐܺܝ ܐܰܢ̱ܬ̥ܬܰܝܕ̥ܶܗ. ܒܰܪܶܟ̥ܡܳܪܝ܀